21 ދުވަހުގެ ތެރޭގައި 924 މިލިޔަން ޑޮލަރުގެ ދަރަނި ދައްކައިފި: ރައީސް މުޢިއްޒު

ވޭތުވެދިޔަ 21 ދުވަހުގެ ތެރޭގައި ދިވެހި ސަރުކާރުން ޖުމުލަ 924 މިލިޔަން ޑޮލަރުގެ ބޭރުގެ ދަރަނި ދައްކައި ޚަލާޞްކޮށްފައިވާ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިޢުލާނު ކުރައްވައިފިއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، މިދިޔަ ކުރު މުއްދަތުގެ ތެރޭގައި ދަރަނި އަދާކުރުމުގައި ބޮޑެތި ކާމިޔާބީތަކެއް ހޯދިފައިވާ ކަމަށެވެ. އެގޮތުން، މި ހިނގާ އޭޕްރީލް މަހުގެ 2 ވަނަ ދުވަހު ސަރުކާރުން ވަނީ 524 މިލިޔަން ޑޮލަރުގެ ސުކޫކެއް ދައްކާފައެވެ. އަދި އޭޕްރީލް 23 ވަނަ ދުވަހު އިންޑިއާއަށް ދައްކަންޖެހޭ 400 މިލިޔަން ޑޮލަރުގެ ކަރަންސީ ސްވޮޕް ފައިސާވެސް ދައްކާފައިވާ ކަމަށް އެމަނިކުފާނު ވިދާޅުވިއެވެ.

ރައީސް މުޢިއްޒު ފާހަގަކުރެއްވި ގޮތުގައި، މި ފައިސާ ދައްކާފައިވަނީ ޤައުމަށް "ޑީފޯލްޓެއް" ނުވަތަ އިޤްތިޞާދީ ބޮޑު އަނދަވަޅަކަށް ވެއްޓުމުގެ ފުރުޞަތު ނުދީއެވެ. އަދި މިކަން ކުރުމުގައި ދައުލަތުގެ އެއްވެސް ހަރުމުދަލެއް ވިއްކާނުލައި، އެއްވެސް ރަހުނެއް ދޫކޮށްނުލާކަން އެމަނިކުފާނު ފާހަގަކުރެއްވިއެވެ. އޭގެ ބަދަލުގައި، ކުރިން ރަހުނުކޮށްފައި ހުރި ބައެއް ތަންތަން ސަލާމަތްކުރައްވާފައިވާ ކަމަށްވެސް ރައީސް ވިދާޅުވިއެވެ.

ބޭރުގެ ދަރަނީގެ އިތުރުން، އެތެރޭގެ ދަރަނި އަދާކުރުމަށްވެސް ސަރުކާރުން ބޮޑު އިސްކަމެއް ދެމުންދާކަން ރައީސް ހާމަކުރެއްވިއެވެ. އެގޮތުން، 2023 ވަނަ އަހަރުގެ ނޮވެމްބަރު މަހުން ފެށިގެން މި އަހަރުގެ އޭޕްރީލް 26 ގެ ނިޔަލަށް، އެކި ލޯކަލް ވެންޑަރުންނަށް ދައްކަންޖެހިފައި ހުރި 3,300 މިލިޔަން ރުފިޔާގެ ބިލުތަކަށް ފައިސާ ދައްކާ ނިންމާފައިވާ ކަމަށް އެމަނިކުފާނު ވިދާޅުވިއެވެ. އަދި މި މަހުގެ ބާކީ އޮތް ދުވަސްތަކުގެ ތެރޭގައި އިތުރު 260 މިލިޔަން ރުފިޔާ ވެންޑަރުންނަށް ދެއްކުމަށް ނިންމާފައިވާ ކަމަށްވެސް ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ސަރުކާރުގެ އަމާޒަކީ ދަރަނިތަކުން ޤައުމު ސަލާމަތްކޮށް، އިޤްތިޞާދު ހަރުދަނާކުރުން ކަމަށެވެ. އަދި މި ހުރިހާ މަސައްކަތެއްވެސް ކުރިއަށްދަނީ ރައްޔިތުންނަށް އެއްވެސް ގެއްލުމެއް ނުލިބޭނޭކަން ކަށަވަރުކުރަމުން ކަމުގައި އެމަނިކުފާނު ވިދާޅުވިއެވެ.