އެމްޑީޕީގެ އިސް ސަފުގައި ގާބިލް އަންހެނުން ތިއްބާ ސޯބެއަށް ޓިކެޓު ދިނުން: މިއީ އިންސާފެއްތަ؟

ސުޕްރީމް ކޯޓުގެ ޙުކުމަކާ ގުޅިގެން ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ގޮނޑި ހުސްވެފައިވާތީ، އެ ދާއިރާގެ ބައި-އިލެކްޝަން އަންނަ ޖޫން މަހުގެ 6 ވާ ހޮނިހިރު ދުވަހު ބޭއްވުމަށް ވަނީ ނިންމާފައެވެ. މި އިންތިޚާބާ ދިމާކޮށް އެމްޑީޕީން އެ ދާއިރާއަށް ވާދަކުރުމުގެ ޓިކެޓު ސޯބެއަށް ދިނުމާ ގުޅިގެން، ޕާޓީގެ އެތެރޭގައާއި އާންމުންގެ މެދުގައި ވަނީ ބޮޑެތި ފާޑުކިޔުންތަކެއް އުފެދި، ސަޕޯޓަރުންގެ މެދުގައި ނުތަނަވަސްކަން އުފެދިފައެވެ. ވަކިން ހާއްސަކޮށް، އެމްޑީޕީގެ އިސް ސަފުގައި ގާބިލް، ތައުލީމީ އަދި ތަޖުރިބާކާރު އަންހެނުން ތިއްބަވައި، މިފަދަ ފުރުސަތެއް ފިރިހެން ކެންޑިޑޭޓަކަށް ދިނުމަކީ އިންސާފުވެރި ގޮތެއްތޯ ގިނަ ބަޔަކު ދަނީ ސުވާލު އުފައްދަމުންނެވެ.

ދިވެހިރާއްޖޭގެ ސިޔާސީ މަސްރަހަށް ބަލާއިރު، އެމްޑީޕީއަކީ އަބަދުވެސް އަންހެނުން ބާރުވެރިކުރުވުމަށާއި، ސިޔާސީ ގޮތުން އަންހެނުންގެ ދައުރު ފުޅާކުރުމަށް އެންމެ ބާރަށް ވަކާލާތު ކުރާ ޕާޓީއެވެ. ނަމަވެސް، އަމަލީ މައިދާނަށް ބަލާއިރު މިކަން ފެންނަނީ މުޅިން ތަފާތު ގޮތަކަށެވެ. އެމްޑީޕީގެ ތެރޭގައި މާރިޔާ އަހުމަދު ދީދީ، އީވާ އަބްދުﷲ، ރޮޒައިނާ އާދަމް އަދި އައިމިނަތު ޝައުނާ ފަދަ ސިޔާސީ ގޮތުން ދޫނުދޭނެ ގާބިލް އަންހެން ބޭފުޅުން ތިއްބެވި އިރު، މުހިންމު ދާއިރާއެއްގެ ޓިކެޓު ސޯބެއަށް ދިނުމަކީ ޕާޓީގެ އިސް ސަފުގައި ތިއްބެވި އަންހެން ކަނބަލުންނަށް ކުރެވުނު މަލާމާތެއް ކަމުގައި ގިނަ ބަޔަކު ސިފަކުރެއެވެ. މި ބޭފުޅުންނަކީ ދާއިރާ ތަމްސީލުކުރުމުގެ ފުރިހަމަ ގާބިލްކަމާއި ތަޖުރިބާ ހުރި ބޭފުޅުންނެވެ. މިއީ ޕާޓީގެ އެތެރޭގައި އޮތް ވަކި ބައެއްގެ ނުފޫޒުން ނިންމާފައިވާ ނިންމުމެއް ކަމަށް ބުނެ، ސަޕޯޓަރުންގެ މެދުގައި ވަނީ ބަހުގެ ހަމަލާތަކެއް ބަދަލުކުރަން ފަށާފައެވެ.

އާންމުންގެ ފާޑުކިޔުންތައް އަމާޒުވެފައިވަނީ، އެމްޑީޕީން ދައްކާ ވާހަކައާއި އަމަލާ ދިމާނުވާ ކަމަށް ބުނެއެވެ. "އަންހެނުންގެ ބައިވެރިވުން" އިތުރުކުރަން ޖެހޭ ކަމަށް ބުނެ ޕޯޑިއަމްތަކުގައި އަޑުގަދަކުރާއިރު، އިންތިޚާބުތަކުގައި ކުރިމަތިލާންވީ ވަގުތު އަންހެނުންނަށް ވުރެ ބޮޑަށް ވަކި ފަރާތްތަކަކަށް ތާއީދުކުރާ ފިރިހެން ކެންޑިޑޭޓުންނަށް އިސްކަންދޭކަން މި ނިންމުމުން ހާމަވާ ކަމަށް ގިނަ ސަޕޯޓަރުން ދަނީ ބުނަމުންނެވެ. ހާއްސަކޮށް ހިތަދޫ އުތުރު ދާއިރާ ކަހަލަ މުހިންމު ދާއިރާއަކަށް، މާރިޔާ ނުވަތަ އީވާ ފަދަ ވަރުގަދަ ސިޔާސީ ޝަޚުސިއްޔަތެއް ނެރުމުގެ ބަދަލުގައި ސޯބެ އިޚްތިޔާރު ކުރުމަކީ އަންހެނުން ބާރުވެރިކުރުވުމުގެ ރޫހާ ޚިލާފު، އަދި ޕާޓީގެ އެތެރޭގެ އެއްބައިވަންތަކަން ގެއްލިގެންދާނެ ކަމެކެވެ.

މި ނިންމުމުގެ ސަބަބުން، އެމްޑީޕީއަކީ ހަމައެކަނި ދައްކާ ވާހަކައަކުން އަންހެނުންގެ ހައްގުގައި ވަކާލާތު ކުރާ ޕާޓީއެއްތޯ ނުވަތަ އަމަލީ ގޮތުން ވެސް އެކަން ކުރާ ޕާޓީއެއްތޯ މިއަދު ވަނީ ސުވާލު އުފެދިފައެވެ. ރޮޒައިނާ އާއި ޝައުނާ ފަދަ އިލްމީ އަދި ހީވާގި އަންހެނުން ފަހަތަށް ޖައްސާލުމަށްފަހު، ވަކި ބައެއްގެ މަސްލަހަތު ހިމާޔަތްކުރާ ކެންޑިޑޭޓުންނަށް ކުރިމަގު ހުޅުވައިދިނުމަކީ ޕާޓީގެ އެތެރޭގެ ޑިމޮކްރަސީއަށާއި، އިންސާފަށް ލިބޭ އުނިކަމެކެވެ. މިއީ ޕާޓީގެ އިޚްލާޞްތެރި ސަޕޯޓަރުންގެ ހިތްތަކުގައި ޝައްކާއި ވަހުމް އުފައްދައި، ޕާޓީ ބައިބައިވުމަށް މަގުފަހިވާނެ ނިންމުމެކެވެ.

ޖުމްލަކޮށް ބަލާއިރު، ހިތަދޫ އުތުރު ދާއިރާގެ ޓިކެޓު ސޯބެއަށް ދިނުމަކީ އެމްޑީޕީގެ އަންހެން ސިޔާސީ ލީޑަރުންގެ ގާބިލްކަމާ މެދު ސުވާލު އުފެއްދުމެވެ. އަންހެނުންނަށް ހަމަހަމަ ފުރުސަތު ދިނުމަކީ ހަމައެކަނި ޝިއާރަކަށް ހަދައިގެން އުޅުމުގެ ބަދަލުގައި، އަމަލުން އެކަން ނުދެއްކޭ ނަމަ، ޕާޓީގެ ސަޕޯޓަރުންގެ އިތުބާރު ގެއްލި، އެތެރޭގެ ފިތުނަވެރިކަން އިތުރުވެގެން ދިއުމަކީ ނުވެ ނުދާނެ ކަމެކެވެ. މިއަދު އެމްޑީޕީގެ އަންހެން ރޫހު ވަނީ މި ނިންމުމުގެ ސަބަބުން މާޔޫސްވެފައެވެ.