ތެލުގެ އަގަށް އަންނަ ބަދަލުތަކަކީ ދުނިޔޭގެ ބާޒާރާ ގުޅިފައިވާ ކަމެއް: ސިޔާސީ އޮޅުވާލުންތަކަށްވުރެ ހަގީގަތް މާ ސާފު

އޮޅުވާލައި، ދޮގު މައުލޫމާތު ފެތުރުމަކީ ގައުމުގެ ކުރިއެރުމަށާއި އިޖުތިމާއީ ބަދަހިކަމަށް އޮތް ބޮޑު ހުރަހެއް ކަމަށް ގިނަ ބަޔަކު ގަބޫލުކުރެއެވެ. މިއަދު ރާއްޖޭގެ ސިޔާސީ މައިދާނުން ފެންނަމުންދަނީ ކަންކަމުގެ އަސްލު ހަގީގަތް އެނގި ތިބެ، ސިޔާސީ މަންފާއަށްޓަކައި ރައްޔިތުންގެ މެދުގައި ނުތަނަވަސްކަން އުފައްދަން މަސައްކަތްކުރާ މަންޒަރެވެ.

މީގެ އެންމެ ސާފު އެއް މިސާލަކީ ތެލުގެ އަގަށް އަންނަ ބަދަލުތަކެވެ. ތަފާސްހިސާބުތަކަށް ބަލާއިރު، 2020 ވަނަ އަހަރު ރާއްޖޭގައި ޕެޓްރޯލް ލީޓަރެއްގެ އަގު ހުރީ ގާތްގަނޑަކަށް 8 ރުފިޔާގައެވެ.

ނަމަވެސް، ކުރީގެ އެމް.ޑީ.ޕީ ސަރުކާރުގައި 2022 ވަނަ އަހަރު މި އަގު ވަނީ 16 ރުފިޔާއަށް އުފުލިފައެވެ. މިއީ 2020 ވަނަ އަހަރާ އަޅާބަލާއިރު ދެގުނަ ބޮޑުވުމެކެވެ. އެ ދުވަހު އެމް.ޑީ.ޕީ އިން އެކަމުގެ ޒިންމާ ނަގާފައި ނުވަނީ، ތެލުގެ އަގު ކަނޑައެޅެނީ ރައީސް އޮފީހުގައި އިންނަވާ ބޭފުޅެއްގެ ސަބަބުން ނޫން ކަމާއި، އެއީ ބައިނަލްއަގުވާމީ ބާޒާރުގެ އަގުތަކަށް ބިނާވާ ކަމެއްކަން އެ ބޭފުޅުންނަށް ވަރަށް ރަނގަޅަށް އެނގިވަޑައިގަންނަވާތީއެވެ.

ދިވެހިރާއްޖެއަކީ ބޭނުންވާ ތެލުގެ ސައްތައިން ސައްތަ އިމްޕޯޓް ކުރާ ގައުމެކެވެ. އެހެންކަމުން، ތެލުގެ އަގަށް ބަދަލު އަންނަނީ ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކާއި، ދުނިޔޭގައި ހިނގާ ހަނގުރާމަތަކާއި، އިގްތިސާދީ ލޮޅުންތަކުގެ ސަބަބުންނެވެ. ކޮންމެ ޒިންމާދާރު ސަރުކާރަކުން ވެސް ކުރިމަތިލާންޖެހޭނެ ހަގީގަތަކީ، ދުނިޔޭގެ ބާޒާރުގައި ތެލުގެ އަގު އުފުލުމުން، އެއަށް ރިއާޔަތްކޮށް ރާއްޖޭގެ ބާޒާރުގައި ވެސް އަގަށް ބަދަލު އައުމަކީ އިގްތިސާދީ ގޮތުން ހިނގާނެ ކަމެއް ކަމެވެ.

މި ހަގީގަތް މިހެން އޮތްއިރު، ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކުގެ އިލްޒާމު މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިސްތަށިފުޅުގައި އެޅުވުމަކީ، ބުއްދި ގަބޫލުކުރާނެ ކަމެއް ނޫން ކަމަށް ސިޔާސީ މުހައްލިލުން ފާހަގަކުރެއެވެ. އެއީ ހަމައެކަނި ރައްޔިތުންގެ މެދުގައި އޮޅުންބޮޅުން އުފެއްދުމަށް ހިންގާ ސިޔާސީ ކުޅިވަރެއް ކަމަށް ބެލެވެއެވެ.

ރައީސް ޑރ. މުއިއްޒުގެ ސަރުކާރުން މަސައްކަތް ކުރަމުންދަނީ ދުނިޔޭގެ އިގްތިސާދީ ހާލަތަށް ރިއާޔަތްކޮށް، ރައްޔިތުންނަށް އެންމެ ލުއިވާނެ ގޮތްތައް ބަލައިގެން ކަމަށްވާއިރު، ހަގީގަތް އޮޅުވާލައިގެން ދައްކާ ވާހަކަތަކަށް ރައްޔިތުން ސަމާލުވުމަކީ މުހިންމު ކަމެކެވެ.